Asian Champions Trophy 2026: ભારતીય પુરુષ હોકી ટીમે સોમવારે જાલંધરના ઓલિમ્પિયન સુરજીત સિંહ હોકી સ્ટેડિયમમાં દક્ષિણ કોરિયાને 8-0થી હરાવી શાનદાર જીત નોંધાવી હતી. ટૂર્નામેન્ટની ગ્રુપ સ્ટેજની છેલ્લી મેચમાં સતત પાંચમી જીત સાથે ભારત અજેય રહ્યું હતું. આ જીત સાથે ભારતીય ટીમ 15 પોઇન્ટ મેળવી પોઇન્ટ ટેબલમાં પ્રથમ સ્થાને રહી હતી.
ભારત તરફથી દિલપ્રીત સિંહે બે ગોલ કર્યા હતા. જ્યારે જુગરાજ સિંહ, હરમનપ્રીત સિંહ, શિલાનંદ લાકડા, સુખજીત સિંહ, સંજય અને અંગદ બીર સિંહે એક-એક ગોલ નોંધાવ્યો હતો.
ભારતે મેચની શરૂઆતથી જ આક્રમક રમત બતાવી હતી. આઠમી મિનિટે દિલપ્રીતે બેકહેન્ડ શૉટથી પહેલો ગોલ કર્યો હતો. ત્યારબાદ 11મી મિનિટે જુગરાજ સિંહે પેનલ્ટી કોર્નર દ્વારા ભારતની સરસાઈ વધારી હતી. 15મી મિનિટે કેપ્ટન હરમનપ્રીત સિંહે પેનલ્ટી કોર્નરને ગોલમાં ફેરવી સ્કોર 3-0 કર્યો હતો.
Asian Champions Trophy 2026: ત્રીજા ક્વાર્ટરમાં ભારતના ચાર ગોલ
બીજા ક્વાર્ટરમાં દક્ષિણ કોરિયાએ વળતો પ્રહાર કરવાનો પ્રયાસ કર્યો હતો અને અનેક પેનલ્ટી કોર્નર મેળવ્યા હતા. જોકે, ભારતીય ડિફેન્સે તમામ પ્રયાસોને નિષ્ફળ બનાવ્યા હતા.
હાફ ટાઇમ બાદ ભારતે ફરી આક્રમક રમત શરૂ કરી હતી. 33મી મિનિટે શિલાનંદ લાકડાએ ગોલ કર્યો હતો. ત્યારબાદ 34મી મિનિટે સુખજીત સિંહે અને 36મી મિનિટે સંજયે ગોલ કરીને ભારતની સરસાઈ 6-0 કરી હતી. 40મી મિનિટે દિલપ્રીતે પોતાનો બીજો ગોલ નોંધાવ્યો હતો.
મેચની છેલ્લી મિનિટે અંગદ બીર સિંહે આઠમો ગોલ કરીને ભારતની જીત 8-0થી નિશ્ચિત કરી હતી.
સેમિફાઇનલમાં ફરી દક્ષિણ કોરિયા સામે ટક્કર
ગ્રુપ સ્ટેજની પાંચેય મેચ જીતનાર ભારતે પાંચ મેચમાં કુલ 34 ગોલ કર્યા હતા અને માત્ર પાંચ ગોલ જ સ્વીકાર્યા હતા. ભારત 15 પોઇન્ટ અને +29ના ગોલ અંતર સાથે પ્રથમ સ્થાને રહ્યું હતું.
જાપાન 10 પોઇન્ટ સાથે બીજા અને મલેશિયા નવ પોઇન્ટ સાથે ત્રીજા સ્થાને રહ્યું હતું. દક્ષિણ કોરિયા છ પોઇન્ટ સાથે ચોથા સ્થાને રહ્યું હતું.
હવે 4 નવેમ્બરે રમાનારી સેમિફાઇનલમાં ભારતનો સામનો ફરી દક્ષિણ કોરિયા સામે થશે. બીજી સેમિફાઇનલમાં જાપાન અને મલેશિયા વચ્ચે મુકાબલો થશે. જ્યારે ટૂર્નામેન્ટની મેડલ મેચો 5 નવેમ્બરે રમાશે.
