Amul Ghee and Butter Price Hike દિવાળી અને તહેવારોની સિઝન નજીક આવતાં જ સામાન્ય નાગરિકો પર મોંઘવારીનો વધુ એક બોજ પડ્યો છે. દેશની અગ્રણી ડેરી બ્રાન્ડ અમૂલ (GCMMF) દ્વારા ઘી અને બટરના ભાવમાં વધારો કરવામાં આવ્યો હોવાના અહેવાલ છે. અલગ-અલગ પેકિંગના ભાવમાં ₹3થી લઈને ₹50 સુધીનો વધારો થયો છે. આ ભાવવધારાની સીધી અસર ગૃહિણીઓના ઘરખર્ચ પર પડશે.
બીજી તરફ, ગણેશોત્સવ બાદથી અમદાવાદ, વડોદરા સહિત ગુજરાતનાં અનેક શહેરોમાં અમૂલ કાઉ ઘી અને રેગ્યુલર બટરની અછત હોવાની ફરિયાદો પણ સામે આવી રહી છે. પરિણામે ગ્રાહકોને કેટલીક જગ્યાએ મનપસંદ પ્રોડક્ટ મેળવવામાં મુશ્કેલી પડી રહી છે.
Amul Ghee and Butter Price Hike અમૂલના ઘી અને બટરના નવા ભાવ
અમૂલના નવા દરો મુજબ, સૌથી વધુ ભાવવધારો 1 કિલોના ઘીના કાર્ટનમાં થયો છે. આ પેકિંગનો ભાવ ₹630થી વધારીને ₹680 કરવામાં આવ્યો છે. જ્યારે 500 ગ્રામના પ્યોર ઘીના પાઉચમાં ₹20નો વધારો થયો છે.
| અમૂલ પ્રોડક્ટ | જૂનો ભાવ | નવો ભાવ | વધારો |
|---|---|---|---|
| ઘી (1 કિલો કાર્ટન) | ₹630 | ₹680 | ₹50 |
| પ્યોર ઘી (500 ગ્રામ પાઉચ) | ₹325 | ₹345 | ₹20 |
| બટર (100 ગ્રામ પેક) | ₹63 | ₹66 | ₹3 |
| બટર (500 ગ્રામ પેક) | ₹310 | ₹325 | ₹15 |
Amul Ghee and Butter Price Hike GSTમાં ઘટાડા બાદ મળેલી રાહત પર અસર
સપ્ટેમ્બર 2025માં ડેરી ઉત્પાદનો પર GSTનો દર 12 ટકાથી ઘટાડીને 5 ટકા કરવામાં આવ્યો હતો. તે સમયે અમૂલે પોતાની 700થી વધુ પ્રોડક્ટ્સના ભાવમાં ઘટાડો કર્યો હોવાનું જણાવાયું હતું.
આ ઘટાડા બાદ 1 લીટર ઘીનો ભાવ ₹650થી ઘટીને ₹610 થયો હતો. તેવી જ રીતે, 100 ગ્રામ બટરનો ભાવ ₹62થી ઘટીને ₹58 થયો હતો. જોકે, હવે થયેલા ભાવવધારાને કારણે ગ્રાહકોને અગાઉ મળેલી રાહતનો કેટલોક હિસ્સો ઓછો થયો છે.
તહેવારોમાં ઘીની માંગ વધતાં સપ્લાય પર દબાણ
ડેરી ઉદ્યોગ સાથે જોડાયેલા સૂત્રોના જણાવ્યા અનુસાર, તહેવારો દરમિયાન ઘીની માંગમાં નોંધપાત્ર વધારો થાય છે. અંદાજ મુજબ, વર્ષ દરમિયાન વેચાતા કુલ ઘીમાંથી આશરે 45 ટકા ઘી તહેવારોની સિઝનમાં વપરાય છે. ગણેશોત્સવથી દિવાળી અને બેસતા વર્ષ સુધી માંગ વધતી હોવાથી સપ્લાય ચેઇન પર દબાણ ઊભું થઈ શકે છે.
નકલી ઘી સામે કાર્યવાહી બાદ બ્રાન્ડેડ ઘીની માંગ
સહકારી ક્ષેત્રનાં સૂત્રોના જણાવ્યા મુજબ, છેલ્લા છ મહિનામાં ગુજરાત અને રાજસ્થાનમાંથી આશરે 2 લાખ કિલો બનાવટી ઘી જપ્ત કરવામાં આવ્યું હોવાનો દાવો છે. નકલી ઘી સામેની કાર્યવાહી બાદ ગ્રાહકો બ્રાન્ડેડ અને વિશ્વાસપાત્ર ઉત્પાદનો તરફ વળી રહ્યા હોવાની શક્યતા વ્યક્ત કરવામાં આવી રહી છે. તેના કારણે અમૂલ જેવી બ્રાન્ડના ઘીની માંગમાં વધારો થયો હોઈ શકે છે.
અમદાવાદ અને વડોદરામાં સ્ટોકની અછતની ફરિયાદ
અમદાવાદના સેટેલાઇટ વિસ્તારનાં કેટલાક સુપરમાર્કેટ અને ડી-માર્ટ સહિતના સ્ટોર્સમાં અમૂલ ઘીનો સ્ટોક ઓછો હોવાની ફરિયાદો છે. વડોદરામાં પણ સ્થાનિક કરિયાણાના વેપારીઓ પાસે ઘી અને બટરની ઉપલબ્ધતા ઘટી હોવાની માહિતી સામે આવી છે.
આ પણ વાંચો CBFC New Guidelines: સેન્સર બોર્ડના 5 નવા નિયમો, હવે અધૂરી ફિલ્મોનું સર્ટિફિકેશન નહીં
