CBFC New Guidelines: કેન્દ્રીય ફિલ્મ પ્રમાણન બોર્ડ (CBFC)એ ફિલ્મોના સર્ટિફિકેશન માટે નવી માર્ગદર્શિકા જાહેર કરી છે. નવા 18 સભ્યોના બોર્ડની રચનાના બે મહિના બાદ જાહેર કરાયેલા આ દિશાનિર્દેશોમાં પાંચ મુખ્ય શરતો ઉમેરવામાં આવી છે. હવે ફિલ્મ નિર્માતાઓએ સર્ટિફિકેશન માટે સંપૂર્ણ તૈયાર ફિલ્મ જ રજૂ કરવી પડશે. એટલું જ નહીં, અગાઉથી જાહેર કરાયેલી ફિલ્મની રિલીઝ તારીખના આધારે સર્ટિફિકેશનની પ્રક્રિયા ઝડપી બનાવવામાં આવશે નહીં.
નવી માર્ગદર્શિકા સિનેમેટોગ્રાફ એક્ટ, 1952 અને સિનેમેટોગ્રાફ રૂલ્સ, 2024 હેઠળ પ્રમાણપત્ર મેળવવા ઇચ્છતા નિર્માતાઓ અને અરજદારો માટે જાહેર કરવામાં આવી છે.
બોર્ડના જણાવ્યા અનુસાર, તપાસ માટે રજૂ કરવામાં આવતી ફિલ્મમાં અંતિમ ગ્રાફિક્સ, બેકગ્રાઉન્ડ સ્કોર, સાઉન્ડ મિક્સ અને સિનેમાઘરોમાં પ્રદર્શન માટે જરૂરી તમામ સુલભતા સુવિધાઓ હોવી જોઈએ. અધૂરી ફિલ્મની અરજી નિયમો મુજબ માન્ય ગણાશે નહીં. આવી અરજી પાછી મોકલવામાં આવી શકે છે અથવા નકારી શકાય છે.
CBFC New Guidelines: ફિલ્મોના ટાઇટલ અને રિલીઝ તારીખ અંગે પણ સ્પષ્ટતા
નવી માર્ગદર્શિકામાં ફિલ્મના નામ અંગે પણ નિર્માતાઓને સાવચેત કરવામાં આવ્યા છે. સર્ટિફિકેશન માટે અરજી કરતી વખતે અગાઉથી જાહેર કરાયેલું ટાઇટલ અંતિમ કે મંજૂર થઈ ગયું હોવાનું માનવું નહીં. જરૂર પડે તો ફિલ્મનું નામ બદલવાની તૈયારી રાખવી પડશે.
તાજેતરમાં કેટલીક ફિલ્મોનાં નામ બદલાયાં હતાં. સલમાન ખાનની ‘બેટલ ઑફ ગલવાન’નું નામ બદલીને ‘માતૃભૂમિ’ કરવામાં આવ્યું હતું. મનોજ બાજપેયીની ‘ઘૂસખોર પંડિત’નું નામ બદલીને ‘ગજબ રાત’ રાખવામાં આવ્યું હતું. આ ઉપરાંત ‘જાનકી વર્સિસ સ્ટેટ ઑફ કેરળ’ના નામમાં પણ ફેરફાર થયો હતો.
થલપતિ વિજયની ફિલ્મ ‘જન નાયકન’ના સર્ટિફિકેશન વિવાદ વચ્ચે પણ રિલીઝ તારીખને લઈને આ મુદ્દો ચર્ચામાં આવ્યો હતો. બોર્ડે સ્પષ્ટ કર્યું છે કે સર્ટિફિકેશનની પ્રક્રિયા નક્કી કરેલી કાયદાકીય સમયમર્યાદા મુજબ જ ચાલશે.
નવા નિયમો સામે હની ત્રેહાને વ્યક્ત કર્યો વિરોધ
દિલજીત દોસાંઝ અભિનીત ફિલ્મ ‘સતલુજ’ના ડિરેક્ટર હની ત્રેહાને નવી માર્ગદર્શિકાની ટીકા કરી છે. તેમણે સોશિયલ મીડિયા પર પોસ્ટ કરીને આ દિશાનિર્દેશોને કાયરતા અને સરમુખત્યારશાહી ગણાવ્યા હતા. તેમના મતે આ અભિવ્યક્તિની સ્વતંત્રતા પ્રત્યેનો લોકતાંત્રિક અભિગમ નથી.
‘સતલુજ’ અગાઉ ‘પંજાબ 95’ નામથી જાણીતી હતી અને શીખ માનવાધિકાર કાર્યકર જસવંત સિંહ ખાલરાના જીવન પર આધારિત છે. સર્ટિફિકેશનમાં વિલંબ બાદ નિર્માતાઓએ તેને ZEE5 પર રજૂ કરી હતી, પરંતુ વિવાદને પગલે ફિલ્મને પ્લેટફોર્મ પરથી હટાવી લેવામાં આવી હતી.
સની દેઓલની ‘સૂર્યા’ પણ વિવાદમાં
આ દરમિયાન સની દેઓલની આગામી ફિલ્મ ‘સૂર્યા: અંત સે આરંભ તક’ સામે પણ કાનૂની વિવાદ ઊભો થયો છે. ચાર ડૉક્ટરોએ ફિલ્મના ટીઝર સામે દિલ્હી હાઇકોર્ટમાં અરજી કરી છે. તેમનો આરોપ છે કે ફિલ્મમાં ખાનગી હોસ્પિટલોના ડૉક્ટરોને ભ્રષ્ટ દર્શાવવામાં આવ્યા છે અને તે આરોગ્યકર્મીઓ સામે હિંસાનું જોખમ વધારી શકે છે.
અરજદારોએ ફિલ્મ પર પ્રતિબંધ મૂકવા અને યુટ્યુબ પરથી ટીઝર હટાવવાની માગ કરી છે. દિલ્હી હાઇકોર્ટે કેન્દ્ર સરકાર, CBFC અને ઝી સ્ટુડિયોઝને નોટિસ પાઠવી જવાબ માગ્યો છે. આ મામલે આગામી સુનાવણી 16 નવેમ્બરે નક્કી કરવામાં આવી હોવાનું અહેવાલમાં જણાવાયું છે.
નવી માર્ગદર્શિકાથી ફિલ્મ નિર્માતાઓએ સર્ટિફિકેશન પહેલાં ફિલ્મની સંપૂર્ણ તૈયારી અને ટાઇટલ અંગે વધુ સાવચેતી રાખવી પડશે.
