Bharti Airtel Market Cap માં આજે પ્રારંભિક કારોબાર દરમિયાન નોંધપાત્ર વધારો જોવા મળ્યો હતો. ભારતી એરટેલના શેરમાં ત્રણ ટકાથી વધુની તેજી આવતાં કંપનીનું બજારમૂલ્ય ₹13 લાખ કરોડને પાર પહોંચી ગયું હતું. આ સાથે એરટેલે મુકેશ અંબાણીની Jio Platformsને પાછળ છોડીને દેશની બીજી સૌથી મૂલ્યવાન કંપનીનું સ્થાન મેળવ્યું હતું. તાજેતરમાં 28 ઓક્ટોબરે શેરબજારમાં લિસ્ટ થયેલી Jio Platformsએ આ સ્થાન મેળવ્યું હતું, પરંતુ એરટેલની તેજી બાદ ક્રમ બદલાયો હતો.
ભારતી એરટેલે ગુરુવારે સપ્ટેમ્બર ત્રિમાસિક ગાળાનાં નાણાકીય પરિણામો જાહેર કર્યા હતા. કંપનીનો ચોખ્ખો નફો ગયા વર્ષના સમાન ગાળાની સરખામણીમાં 31 ટકા વધીને ₹8,887.5 કરોડ નોંધાયો હતો. જ્યારે કંપનીની આવક 17 ટકા વધીને ₹60,878 કરોડ થઈ હતી.
આ મજબૂત પરિણામોની અસર શેરબજારમાં જોવા મળી હતી. BSE પર પ્રારંભિક કારોબારમાં એરટેલનો શેર ત્રણ ટકા વધીને ₹2,120 સુધી પહોંચ્યો હતો.
Bharti Airtel Market Cap માં તેજીથી Jioને પાછળ છોડ્યું
સવારે 10.45 વાગ્યે એરટેલનો શેર 0.68 ટકાના વધારા સાથે ₹2,076.10 પર કારોબાર કરી રહ્યો હતો. આ ભાવે કંપનીનું માર્કેટ કેપ ₹12,95,590.42 કરોડ હતું.
બીજી તરફ, Jio Platformsનો શેર 1.50 ટકા ઘટીને ₹1,397.25 પર પહોંચ્યો હતો. આ સાથે તેનું માર્કેટ કેપ ₹12,86,685.79 કરોડ નોંધાયું હતું. દેશની સૌથી મૂલ્યવાન કંપની તરીકે રિલાયન્સ ઇન્ડસ્ટ્રીઝનું સ્થાન યથાવત્ છે, જેનું માર્કેટ કેપ ₹17,73,642.19 કરોડ હતું.
એરટેલનો ARPU પણ વધ્યો
એરટેલનો એવરેજ રેવન્યુ પર યુઝર (ARPU) સપ્ટેમ્બર ત્રિમાસિકમાં વધીને ₹271 થયો હતો. ગયા વર્ષના સમાન ગાળામાં આ આંકડો ₹256 હતો. બીજી તરફ, Jio Platformsનો ARPU ₹218.8 નોંધાયો હતો.
આ આંકડા મુજબ, ARPUની બાબતમાં એરટેલે ટેલિકોમ ક્ષેત્રમાં પોતાની અગ્રણી સ્થિતિ જાળવી રાખી છે. વોડાફોન આઇડિયાએ આ સમયગાળાનાં પરિણામો જાહેર કર્યા ન હોવાથી તેની સરખામણી ઉપલબ્ધ નથી.
