Changda Cow Deathsની દુઃખદ ઘટના બનાસકાંઠાના વાવ-થરાદ તાલુકાના ચાંગડા ગામમાં આવેલી ધરણીધર ગૌશાળામાં સામે આવી છે. ગૌશાળામાં એકસાથે મોટી સંખ્યામાં ગાયોની તબિયત બગડતાં 44 ગાયોનાં મોત થયાં છે, જ્યારે 90થી વધુ ગાયોને ફૂડ પોઇઝનિંગની અસર થઈ હોવાનું પ્રાથમિક માહિતીમાં જણાવાયું છે. ઘટનાને પગલે ગૌશાળાના સંચાલકો, ટ્રસ્ટીઓ અને ગૌપ્રેમીઓમાં શોકની લાગણી ફેલાઈ છે.
મળતી પ્રાથમિક માહિતી મુજબ, ગૌશાળામાં ગાયોની તબિયત અચાનક લથડવા લાગી હતી. એક પછી એક ગાયોની સ્થિતિ ગંભીર બનતાં સંચાલકોમાં ચિંતા ફેલાઈ હતી. ઘટનાની જાણ થતાં ગૌપ્રેમીઓ પણ મોટી સંખ્યામાં ગૌશાળા ખાતે પહોંચ્યા હતા.
લીલા મકાઈના ચારાને કારણે ફૂડ પોઇઝનિંગની આશંકા
પ્રાથમિક અનુમાન પ્રમાણે ગાયોએ લીલો મકાઈનો ચારો ખાધા બાદ તેમની તબિયત બગડી હોઈ શકે છે. જોકે, ચારામાં કયા પ્રકારનું ઝેરી તત્ત્વ હતું કે અન્ય કોઈ કારણસર ગાયોને અસર થઈ તે અંગે હજુ સુધી ચોક્કસ માહિતી સામે આવી નથી. આ દિશામાં તપાસ હાથ ધરવામાં આવી છે.
Changda Cow Deaths: પશુચિકિત્સકોની ટીમે શરૂ કરી સારવાર
ઘટનાની ગંભીરતાને ધ્યાનમાં રાખીને પશુચિકિત્સકોની ટીમ ગૌશાળા ખાતે પહોંચી હતી અને અસરગ્રસ્ત ગાયોની સારવાર શરૂ કરી હતી. મળતી માહિતી મુજબ, સમયસર સારવાર મળતાં 40થી વધુ ગાયોને બચાવી લેવામાં આવી છે. જોકે, 44 ગાયોનાં મોત થતાં ગૌશાળામાં ભારે શોકનો માહોલ છે.
મૃત ગાયોની દફનવિધિ ગૌપ્રેમીઓ દ્વારા કરવામાં આવી હતી. બીજી તરફ, મોતનું ચોક્કસ કારણ જાણવા કેટલીક મૃત ગાયોના પોસ્ટમોર્ટમની કાર્યવાહી હાથ ધરવામાં આવી છે.
હાલમાં લીલા ચારામાં ઝેરી તત્ત્વની હાજરી હતી કે કેમ અને ગાયોનાં મોત પાછળનું ચોક્કસ કારણ શું હતું તે તપાસના અહેવાલ બાદ જ સ્પષ્ટ થશે. ત્યાં સુધી ફૂડ પોઇઝનિંગનું કારણ પ્રાથમિક અનુમાન તરીકે જ જોવું જરૂરી છે.
