Gandhidham Cyber Fraud કેસમાં પૂર્વ કચ્છના ગાંધીધામની એક કંપની સાથે 8.46 કરોડ રૂપિયાથી વધુની ઓનલાઇન છેતરપિંડીનો પર્દાફાશ થયો છે. સાયબર ઠગોએ કંપનીના બેંક ખાતામાંથી 211 જેટલા અલગ-અલગ ટ્રાન્ઝેક્શન કરીને મોટી રકમ અન્ય ખાતાઓમાં ટ્રાન્સફર કરી હતી. આ મામલે કંપનીના સંચાલકોની ફરિયાદના આધારે 5 નવેમ્બરે ગાંધીધામ સાયબર ક્રાઇમ પોલીસ સ્ટેશનમાં ગુનો નોંધાયો હતો.
ફરિયાદ મળ્યા બાદ પોલીસે બેંક વ્યવહારો અને ડિજિટલ પુરાવાઓના આધારે તપાસ શરૂ કરી હતી. તપાસને આગળ વધારવા ગુજરાત સહિત દેશનાં જુદા-જુદા વિસ્તારોમાં 10 વિશેષ પોલીસ ટીમો મોકલવામાં આવી હતી.
Gandhidham Cyber Fraudમાં 8 રાજ્યોમાં દરોડા, 13 આરોપી ઝડપાયા
પોલીસે રાજસ્થાન, આસામ, છત્તીસગઢ, મધ્યપ્રદેશ, તેલંગાણા, આંધ્રપ્રદેશ, દિલ્હી અને હરિયાણામાં દરોડા પાડ્યા હતા. આ કાર્યવાહી દરમિયાન કથિત કૌભાંડમાં સંડોવાયેલા 13 આરોપીઓની ધરપકડ કરવામાં આવી હતી. તમામ આરોપીઓને ગાંધીધામ લાવી પૂછપરછ હાથ ધરવામાં આવી છે.
પ્રાથમિક તપાસમાં સામે આવેલી વિગતો પ્રમાણે, આરોપીઓ બોગસ શેલ કંપનીઓ ઊભી કરીને અને કમિશનના બદલામાં અન્ય લોકોનાં બેંક ખાતાં મેળવીને છેતરપિંડીની રકમ ટ્રાન્સફર કરતા હતા. ત્યારબાદ આ નાણાં વિવિધ ખાતાઓ મારફતે ઉપાડી લેવામાં આવતા હતા.
પોલીસે ઝડપી કાર્યવાહી કરીને છેતરપિંડીની રકમમાંથી 3.82 કરોડ રૂપિયાથી વધુ રકમ અલગ-અલગ બેંક ખાતાઓમાં હોલ્ડ અને ફ્રીઝ કરાવી છે. આ રકમ પરત મેળવવાની પ્રક્રિયામાં ભોગ બનનાર કંપનીને રાહત મળી શકે છે.
મોબાઇલ, લેપટોપ સહિતનાં સાધનો જપ્ત
આરોપીઓ પાસેથી 14 મોબાઇલ ફોન, બે લેપટોપ અને એક સીપીયુ હાર્ડડિસ્ક સહિતનાં ઇલેક્ટ્રોનિક સાધનો કબજે કરવામાં આવ્યાં છે. આ ઉપકરણોમાંથી ડિજિટલ માહિતી મેળવવાની પ્રક્રિયા ચાલી રહી છે.
પ્રાથમિક તપાસમાં 13 આરોપીઓમાંથી ચારનો અગાઉનો ગુનાહિત ઇતિહાસ પણ સામે આવ્યો છે. આ ટોળકીએ અન્ય રાજ્યોમાં પણ આવી છેતરપિંડી કરી છે કે નહીં અને તેમાં બીજા કોઈ લોકો સંડોવાયેલા છે કે નહીં તે અંગે પોલીસ તપાસ કરી રહી છે.
