Gujarat Weather Forecast મુજબ ગુજરાતમાં આગામી 16 નવેમ્બર સુધી હવામાન મુખ્યત્વે સૂકું રહેવાની શક્યતા છે. ભારતીય હવામાન વિભાગ (IMD)ના બુલેટિન અનુસાર, સૌરાષ્ટ્ર-કચ્છ સહિત રાજ્યના તમામ વિસ્તારોમાં વરસાદની કોઈ ખાસ ગતિવિધિની આગાહી નથી. બીજી તરફ, 11 નવેમ્બરે દેશના અનેક રાજ્યોમાં વરસાદ, ગાજવીજ અને તેજ પવન ફૂંકાવાની શક્યતા વ્યક્ત કરવામાં આવી છે.
ગુજરાત ઉપરાંત દીવ, દમણ અને દાદરા-નગર હવેલીમાં પણ હવામાન સૂકું રહેવાની આગાહી છે. આગામી દિવસોમાં રાજ્યના લઘુત્તમ તાપમાનમાં મોટો ફેરફાર થવાની શક્યતા નથી. આથી હાલ ગુજરાતમાં વરસાદને લઈને કોઈ ખાસ ચેતવણી આપવામાં આવી નથી.
Gujarat Weather Forecast વચ્ચે અન્ય રાજ્યોમાં વરસાદની આગાહી
IMDના પૂર્વાનુમાન પ્રમાણે 11 નવેમ્બરે દિલ્હી-NCR, ઉત્તર પ્રદેશ, બિહાર, ઝારખંડ, પશ્ચિમ બંગાળ, રાજસ્થાન, મધ્ય પ્રદેશ અને પંજાબના કેટલાક વિસ્તારોમાં વરસાદ પડી શકે છે. આ વિસ્તારોમાં ગાજવીજ સાથે વીજળી પડવાની પણ શક્યતા છે.
પશ્ચિમ બંગાળમાં પવનની ઝડપ 70થી 75 કિલોમીટર પ્રતિ કલાક સુધી પહોંચી શકે છે. જ્યારે હિમાચલ પ્રદેશમાં 60 કિલોમીટર પ્રતિ કલાકની ઝડપે પવન ફૂંકાવાની આગાહી કરવામાં આવી છે. ઉત્તરાખંડ, જમ્મુ-કાશ્મીર અને લદ્દાખમાં પણ હવામાનમાં ફેરફાર થઈ શકે છે.
દક્ષિણ ભારતમાં તમિલનાડુ અને પુડુચેરી માટે ભારે વરસાદની ચેતવણી આપવામાં આવી છે. પૂર્વોત્તર ભારતના કેટલાક વિસ્તારોમાં પણ ગાજવીજ અને વીજળી પડવાનું જોખમ છે.
બંગાળની ખાડીમાં લો-પ્રેશર સિસ્ટમની શક્યતા
હવામાન વિભાગના જણાવ્યા મુજબ, દક્ષિણ-પૂર્વ બંગાળની ખાડી ઉપર લો-પ્રેશર સિસ્ટમ રચાઈ શકે છે. તેના કારણે આગામી 24 કલાક દરમિયાન ઉત્તર-પશ્ચિમ તરફના વિસ્તારોમાં વરસાદી ગતિવિધિઓ વધી શકે છે.
IMDના સિનેપ્ટિક વિશ્લેષણ મુજબ, દક્ષિણ-પૂર્વ રાજસ્થાન અને આસપાસના વિસ્તારોમાં ચક્રવાતી પરિભ્રમણ પણ યથાવત્ છે. જોકે, હાલની આગાહી પ્રમાણે ગુજરાતમાં સૂકા હવામાનનો માહોલ ચાલુ રહેવાની શક્યતા છે.
