ગુજરાત ભાજપમાં ચાલી રહેલી આંતરિક જૂથબંધી અને વિવાદો ફરી એકવાર સપાટી પર આવ્યા છે. નર્મદા જિલ્લાના પાટનગર રાજપીપળા ખાતે યોજાયેલા ભાજપના એક સત્તાવાર જાહેર કાર્યક્રમ દરમિયાન નાંદોદ બેઠકના ભાજપના જ મહિલા ધારાસભ્ય ડૉ. દર્શનાબેન દેશમુખ (Dr. Darshana Deshmukh) ના કથિત અપમાનને લઈને હાઈવોલ્ટેજ રાજકીય ડ્રામા સર્જાયો છે. કાર્યક્રમમાં પ્રોટોકોલ મુજબ યોગ્ય સ્વાગત અને સન્માન ન જળવાયું હોવાનો ગંભીર આક્ષેપ લગાવીને મહિલા ધારાસભ્ય સ્ટેજ પરથી વોક-આઉટ કરી ગયા હતા અને હોદ્દા પરથી રાજીનામું આપી દેવાની ખુલ્લી ચીમકી આપીને રસ્તા પર જ ધરણા પર બેસી ગયા છે.
પ્રોટોકોલ ભંગનો આક્ષેપ: સન્માન ન મળતા જનપ્રતિનિધિનો આક્રોશ
દિવ્ય ભાસ્કર અને સ્થાનિક મીડિયાના અહેવાલો અનુસાર, રાજપીપળાના આ કાર્યક્રમમાં સ્ટેજ સંચાલન અને સ્થાનિક સંગઠન દ્વારા પ્રોટોકોલના લીરેલીરા ઉડાડવામાં આવ્યા હતા. પ્રોટોકોલ મુજબ ધારાસભ્યનું જે સન્માન થવું જોઈએ તે ન કરીને તેમને નજરઅંદાજ કરવામાં આવ્યા હતા. ડૉ. દર્શનાબેને મીડિયા સમક્ષ ભારે આક્રોશ સાથે જણાવ્યું કે, “જ્યારે પક્ષના સત્તાવાર કાર્યક્રમોમાં જ ચૂંટાયેલા જનપ્રતિનિધિ અને મહિલા ધારાસભ્યનું સન્માન ન જળવાતું હોય, તો સંગઠનની આ જોહુકમી બિલકુલ સાંખી લેવામાં નહીં આવે.” આ ઘટનાના વીડિયો વાયરલ થતાં જ કમલમ (ગાંધીનગર) સુધી ટેન્શન વધી ગયું છે.
જૂની અદાવત ભૂલી સાંસદ મનસુખ વસાવા ધારાસભ્યના સમર્થનમાં આવ્યા
આ સમગ્ર હાઈવોલ્ટેજ ડ્રામામાં સૌથી મોટો વળાંક ત્યારે આવ્યો જ્યારે ભરૂચના ભાજપ સાંસદ મનસુખ વસાવા (Mansukh Vasava) તાત્કાલિક ધારાસભ્ય દર્શનાબેનની વહારે આવ્યા હતા. ભૂતકાળમાં ભ્રષ્ટાચાર અને પત્રકાંડના મુદ્દે જે બંને નેતાઓ વચ્ચે ભારે કડવાશ અને આક્ષેપબાજી જોવા મળતી હતી, તે મનસુખ વસાવાએ પણ સ્થાનિક સંગઠન પર આકરા પ્રહારો કર્યા છે. વસાવાએ ધારાસભ્યના વિરોધને યોગ્ય ઠેરવીને સંગઠનના જવાબદારો સામે પગલાં લેવાની માંગ કરી છે. નર્મદા ભાજપમાં સર્જાયેલા આ આંતરિક ઘર્ષણના કારણે પક્ષની છબી ખરડાઈ છે, ત્યારે પ્રદેશ પ્રમુખ સી.આર. પાટીલ આ મામલે કેવા ડેમેજ કંટ્રોલ પગલાં ભરે છે તેના પર સૌની નજર મંડાડી છે.
