Mehmedabad Crocodile Rescue ખેડા જિલ્લાના મહેમદાવાદ તાલુકામાં છેલ્લા કેટલાક દિવસોથી મગરોના વધતા જતાં ઉપદ્રવને કારણે ગ્રામજનોમાં ભારે ભયનો માહોલ જોવા મળી રહ્યો છે. રહેણાંક વિસ્તારો અને ખેતરોમાં મગરો ઘૂસી આવવાની વધતી જતી ઘટનાઓને પગલે વન વિભાગ અને રેસ્ક્યુ ટીમ દ્વારા સફળ ઓપરેશન હાથ ધરીને મગરોને પકડી લેવામાં આવ્યા છે. જોકે, આ બચાવ કામગીરી દરમિયાન એક વન અધિકારી ઈજાગ્રસ્ત થતા તેમને હોસ્પિટલ ખસેડવામાં આવ્યા છે.
Mehmedabad Crocodile Rescue જીભયપુરા અને રીંછોલમાં મગરનો આતંક
તાલુકાના વિવિધ ગામોમાં મગરો દેખાવાની ઘટનાઓ બાદ લોકોમાં ફફડાટ વ્યાપી ગયો છે:
-
જીભયપુરા: મહેમદાવાદના જીભયપુરાથી કચ્છઈ તરફ જતા મુખ્ય માર્ગ પર ૧૨ ફૂટથી વધુ લંબાઈ ધરાવતો એક વિશાળકાય મગર રસ્તા પર આવી ચડ્યો હતો. માર્ગ પર મગર જોતા જ વાહનચાલકો અને સ્થાનિકોમાં દોડધામ મચી ગઈ હતી.
-
રીંછોલ: એક રહેણાંક મકાનની અંદર ૭ ફૂટથી વધુ લાંબો મગર ઘૂસી આવતા પરિવારજનોમાં ગભરાટ ફેલાયો હતો. વહેલી સવારે ઘરમાં મગર જોઈને લોકોના જીવ અધ્ધર થઈ ગયા હતા.
રેસ્ક્યુ ઓપરેશન અને અધિકારીને ઈજા
વન વિભાગની ટીમ અને સ્થાનિક મદદગારો દ્વારા ભારે જહેમત બાદ બંને મગરોને સુરક્ષિત રીતે પકડી લેવામાં આવ્યા હતા. રીંછોલ ગામમાં મગરને રેસ્ક્યુ કરતી વખતે આરએફઓ (RFO) અધિકારી ઈજાગ્રસ્ત થયા હતા. તેમને તાત્કાલિક સારવાર માટે ગાંધીનગરની ખાનગી હોસ્પિટલમાં ખસેડવામાં આવ્યા છે, જ્યાં તેમની સારવાર ચાલી રહી છે.
ગ્રામજનોમાં ચિંતાનું મોજું
આ ઉપરાંત થોડા દિવસો પહેલા વરસોલા ગામના તળાવમાં પણ મગર જોવા મળ્યો હતો. સતત બની રહેલી આવી ઘટનાઓને કારણે ખેડૂતો અને ગ્રામજનો પોતાના ખેતરોમાં જતા ડરી રહ્યા છે. હાલમાં બંને મગરોને મહેમદાવાદ ફોરેસ્ટ ઓફિસ ખાતે રાખવામાં આવ્યા છે અને તેમને તેમના કુદરતી આવાસમાં છોડવા માટે વન વિભાગ દ્વારા કાર્યવાહી હાથ ધરવામાં આવી છે. તંત્ર દ્વારા સ્થાનિક લોકોને નદી-તળાવ કિનારે સાવચેત રહેવા સૂચના આપવામાં આવી છે.
આ પણ વાંચોઐતિહાસિક સિદ્ધિ: કોમનવેલ્થ ગેમ્સમાં ગોલ્ડ મેડલ જીતનારી પ્રથમ ભારતીય જ્યુડોકા બની અસ્મિતા ડે
