લોરેન્સ બિશ્નોઈ ગેંગ : એનસીપી નેતા બાબા સિદ્દીકીની શનિવારે મોડી રાત્રે મુંબઈના બાંદ્રામાં ગોળી મારીને હત્યા કરવામાં આવી હતી. પોલીસે હત્યાકાંડમાં સામેલ 3માંથી 2 શૂટરની ધરપકડ કરી છે. જ્યારે ત્રીજા ફરાર શૂટરને શોધવા માટે મુંબઈ પોલીસે 3 ટીમો બનાવી છે. લોરેન્સ બિશ્નોઈ ગેંગે હત્યાની જવાબદારી લીધી છે. લોરેન્સ બિશ્નોઈ ગેંગે આ અંગે સોશિયલ મીડિયા પર એક પોસ્ટ પણ શેર કરી છે. જેમાં સિદ્દીકીની હત્યાની જવાબદારી લેવામાં આવી છે. NIA ગેંગસ્ટર લોરેન્સ બિશ્નોઈ અને ગોલ્ડી બ્રાર ગેંગ વિરુદ્ધ સતત કાર્યવાહી કરી રહી છે.
NIAએ ગેંગસ્ટર ટેરર કેસમાં ગેંગસ્ટર લોરેન્સ બિશ્નાઈ અને ગોલ્ડી બ્રાર વિરુદ્ધ ચાર્જશીટ દાખલ કરીને મોટો ખુલાસો કર્યો છે. લોરેન્સ બિશ્નોઈ દાઉદ ઈબ્રાહિમના રસ્તે છે. NIAની ચાર્જશીટ મુજબ લોરેન્સ બિશ્નોઈએ દાઉદ ઈબ્રાહિમની જેમ પોતાની ગેંગ ઉભી કરી છે. લૉરેન્સનું નેટવર્ક 90ના દાયકામાં દાઉદ ઈબ્રાહિમના નેટવર્ક જેવું જ છે.
લોરેન્સ ગેંગ દાઉદની તર્જ પર આગળ વધી રહી છે
દાઉદ ઈબ્રાહિમે 90ના દાયકામાં ટાર્ગેટ કિલિંગ, ખંડણી રેકેટ દ્વારા પોતાનું સામ્રાજ્ય બનાવ્યું હતું અને પછી ડી કંપની બનાવી હતી. આ પછી તેઓએ પાકિસ્તાની આતંકવાદીઓ સાથે ગઠબંધન કર્યું અને પોતાનું નેટવર્ક વધાર્યું. મુંબઈ બોમ્બ વિસ્ફોટો બાદ દાઉદ ઈબ્રાહિમ મુંબઈથી ભાગી ગયો હતો અને પહેલા દુબઈ અને પછી પાકિસ્તાન ગયો હતો.
દાઉદ ઈબ્રાહિમની જેમ લોરેન્સ બિશ્નોઈએ ઉત્તર ભારતમાં નાના ગુનાઓ કરીને ગેંગ શરૂ કરી હતી. NIAના વોન્ટેડ ગોલ્ડી બ્રાર દ્વારા, લોરેન્સ જેલમાં બેસીને તેની ગેંગનું સંચાલન કરી રહ્યો છે. NIA અનુસાર, બિશ્નોઈ ગેંગમાં 700 થી વધુ શૂટર્સ છે, જેમાંથી 300 માત્ર પંજાબના છે. બિશ્નોઈ ગેંગે વર્ષ 2021માં ખંડણી દ્વારા કરોડો રૂપિયાની કમાણી કરી હતી અને આ પૈસા હવાલા મારફતે વિદેશ મોકલવામાં આવ્યા હતા.
નેટવર્ક 11 રાજ્યો અને 6 દેશોમાં ફેલાયેલું છે
લોરેન્સ ગેંગનું સામ્રાજ્ય ભારતના 11 રાજ્યો અને 6 દેશોમાં ફેલાયેલું છે. NIAના મતે, આ ગેંગ એક સમયે માત્ર પંજાબ પુરતી જ સીમિત હતી, પરંતુ તેના ચાલાક મનથી લોરેન્સે તેને હરિયાણા, રાજસ્થાન અને દિલ્હીની ગેંગ સાથે સાંકળીને મોટી ગેંગ બનાવી હતી. સોશિયલ મીડિયા દ્વારા યુવાનોને ગેંગમાં સામેલ કરવામાં આવે છે. બિશ્નોઈનું સામ્રાજ્ય યુએસએ, અઝરબૈજાન, પોર્ટુગલ, યુએઈ અને રશિયામાં ફેલાયેલું છે.
ગેંગે આ સેલિબ્રિટીઓની હત્યા કરી છે
લોરેન્સ બિશ્નોઈ ગેંગે અત્યાર સુધી પંજાબી ગાયક સિદ્ધુ મૂઝવાલા, કરણી સેના પ્રમુખ સુખદેવ સિંહ ગોગામેડી, રાજસ્થાન ગેંગસ્ટર રાજુ થેહત અને એનસીપી નેતા બાબા સિદ્દીકીની હત્યા કરી છે. આ સિવાય લોરેન્સે અભિનેતા સલમાન ખાનને મારી નાખવાની ધમકી પણ આપી છે. ઘણા પંજાબી ગાયકોને ખંડણી માટે જાનથી મારી નાખવાની ધમકી પણ આપવામાં આવી છે.
આ પણ વાંચો – NCP નેતા બાબા સિદ્દીકીની મુંબઈમાં હત્યા, અજાણ્યા હુમલાખોરોએ ગોળી મારી
