સાબરકાંઠામાં ASI હત્યા કેસનો ભેદ ઉકેલાયો, મહિલા હેડ કોન્સ્ટેબલ સહિત 4 આરોપીઓની ધરપકડ

Sabarkantha ASI Murder Case

Sabarkantha ASI Murder Caseમાં અરવલ્લી લોકલ ક્રાઇમ બ્રાન્ચ (LCB)એ ચિથોડા પોલીસ સ્ટેશનમાં ફરજ બજાવતા આસિસ્ટન્ટ સબ ઇન્સ્પેક્ટર (ASI) અશ્વિન તબિયાડની હત્યાનો ભેદ ઉકેલ્યો છે. આ કેસમાં પોલીસ સ્ટેશનમાં જ ફરજ બજાવતી મહિલા હેડ કોન્સ્ટેબલ અલ્ફા કલસવા (37) સહિત ચાર આરોપીઓની ધરપકડ કરવામાં આવી છે. પોલીસના જણાવ્યા અનુસાર, પ્રેમસંબંધનો અંત લાવવાના વિવાદમાં આ હત્યા કરવામાં આવી હતી.

મૃતક અશ્વિન તબિયાડ અરવલ્લી જિલ્લાના ભિલોડા તાલુકાના ઝિંઝોડી ગામના રહેવાસી હતા. તેઓ 8 નવેમ્બરની રાત્રે લગભગ 10:15 વાગ્યે પોતાની મારુતિ અર્ટિગા કારમાં ઘરેથી નીકળ્યા હતા, પરંતુ પરત ફર્યા નહોતા.

10 નવેમ્બરે ભિલોડા તાલુકાના પાદરા ગામ નજીક હાથમતી નદીના કિનારેથી તેમની સળગેલી કાર મળી આવી હતી. કારમાંથી સળગી ગયેલા માનવ અવશેષો મળ્યા હતા. તેમના પિતાએ આ અવશેષો પુત્રના હોવાની આશંકા વ્યક્ત કરી હતી.

Sabarkantha ASI Murder Case: પ્રેમસંબંધના વિવાદમાં હત્યાનો આરોપ

પોલીસ તપાસમાં સામે આવ્યું હતું કે અશ્વિન અને મહિલા હેડ કોન્સ્ટેબલ અલ્ફા કલસવા વચ્ચે પ્રેમસંબંધ હતો. પોલીસના દાવા મુજબ, અલ્ફા આ સંબંધનો અંત લાવવા માગતી હતી, જ્યારે અશ્વિન સંબંધ ચાલુ રાખવા દબાણ કરતા હતા. આ વિવાદના પગલે અલ્ફાએ 8 નવેમ્બરની રાત્રે અશ્વિનને ચિથોડા સ્થિત પોતાના ભાડાના ઘરે બોલાવ્યા હતા, જ્યાં તેમની હત્યા કરવામાં આવી હોવાનો પોલીસનો આરોપ છે.

અરવલ્લીના SP મનોહરસિંહ જાડેજાના જણાવ્યા અનુસાર, હત્યા બાદ મૃતદેહને કોથળામાં ભરી ઘરમાં છુપાવવામાં આવ્યો હતો. અલ્ફાએ પોતાના ભાઈ કલ્પેશ અને પિતરાઈ ભાઈ પંકજની મદદ લીધી હતી. બાદમાં મૃતદેહને અર્ટિગા કારમાં મૂકીને જંગલ વિસ્તારમાં લઈ જવામાં આવ્યો હતો.

પોલીસના જણાવ્યા મુજબ, રાત્રે મનોજ નિનામાને પણ બોલાવવામાં આવ્યો હતો. ચારેય આરોપીઓ કાર લઈને હાથમતી નદીના કિનારે પહોંચ્યા હતા. ત્યાં કાર પર પેટ્રોલ છાંટી આગ લગાવી દેવામાં આવી હતી, જેથી પુરાવાનો નાશ થઈ શકે.

પોલીસે અરવલ્લી અને સાબરકાંઠાના વિસ્તારોનાં CCTV ફૂટેજ, ટેક્નિકલ તપાસ અને બાતમીના આધારે આરોપીઓ સુધી પહોંચ્યાનો દાવો કર્યો છે. તપાસમાં વિજયનગરના પેટ્રોલ પંપ પરથી કેનમાં પેટ્રોલ ખરીદવાની કડી પણ મળી હતી.

આ કેસમાં અલ્ફા કલસવા, કલ્પેશ કલસવા, પંકજ અને મનોજ નિનામાની ધરપકડ કરવામાં આવી છે. હત્યાના ચોક્કસ સંજોગો અને અન્ય વિગતો અંગે પોલીસ તપાસ આગળ વધારી રહી છે.

Tribal Farmers Scheme: 14 જિલ્લાના ખેડૂતોને રવિ પાક માટે સહાય