Mehmadabad Nagarpalika By Election : મહેમદાવાદ નગરપાલિકાની આગામી પેટા ચૂંટણી પહેલા જ ભારતીય જનતા પાર્ટી (ભાજપ) એ એક મોટો રાજકીય ખેલ પાડીને નવો ઇતિહાસ રચી દીધો છે. નગરપાલિકાના વોર્ડ નંબર 1 અને 5 ની ખાલી પડેલી બેઠકો પર ભાજપના ઉમેદવારો મતદાન પહેલા જ ‘બિનહરીફ’ (Unopposed) ચૂંટાઈ આવ્યા છે. વિપક્ષ પાસે ઉમેદવાર જ ન બચતા કે ફોર્મ પાછા ખેંચાઈ જતા ભાજપે ચૂંટણી લડ્યા વિના જ ભવ્ય વિજયનો સ્વાદ ચાખ્યો છે.
Mehmadabad Nagarpalika By Election: ધારાસભ્ય અર્જુનસિંહ અને જય ભટ્ટની મહેનત લાવી રંગ
આ ઐતિહાસિક અને બિનહરીફ જીતનો સંપૂર્ણ શ્રેય મહેમદાવાદના લોકપ્રિય ધારાસભ્ય અર્જુનસિંહ અને શહેર ભાજપ પ્રમુખ જય ભટ્ટની સચોટ રાજકીય રણનીતિ અને સખત મહેનતને જાય છે. આ બંને નેતાઓના મજબૂત લોકસંપર્ક, માઇક્રો-પ્લાનિંગ અને કુનેહને કારણે વિપક્ષને મેદાન છોડવાની ફરજ પડી હતી. પરિણામે, વિરોધી છાવણીમાં સોપો પડી ગયો હતો અને ચૂંટણી યોજાય તે પહેલા જ ભાજપે મેદાન મારી લીધું હતું.
આ ઉમેદવારો બન્યા બિનહરીફ વિજેતા
સ્થાનિક ચૂંટણી અધિકારી દ્વારા સત્તાવાર રીતે જાહેર કરાયેલી વિગતો મુજબ:
વોર્ડ નંબર 1: આ વોર્ડમાંથી ભાજપના ઉમેદવાર તુષારકુમાર ચંદ્રકાંત મહેતા અને હંશાબેન વિનયભાઈ રોહિતને બિનહરીફ વિજેતા ઘોષિત કરવામાં આવ્યા છે.
વોર્ડ નંબર 5: આ વોર્ડની મહત્વની બેઠક પરથી ભાજપના ઉમેદવાર માલાબેન સુધીરભાઈ પટેલીયાએ બિનહરીફ જીત હાંસલ કરી છે.
કાર્યકરોમાં દિવાળી જેવો માહોલ
ઉમેદવારો બિનહરીફ જાહેર થતાં જ મહેમદાવાદ ભાજપ કાર્યાલય ખાતે દિવાળી જેવો માહોલ સર્જાયો હતો. ધારાસભ્ય અર્જુનસિંહ અને પ્રમુખ જય ભટ્ટની ઉપસ્થિતિમાં વિજેતા ઉમેદવારોને ફૂલહાર પહેરાવી, મીઠાઈ ખવડાવીને ભવ્ય સ્વાગત કરવામાં આવ્યું હતું. આ બિનહરીફ જીતે સાબિત કરી દીધું છે કે મહેમદાવાદના રાજકારણમાં હાલ ભાજપના સંગઠનની પકડ અત્યંત મજબૂત છે.
આ પણ વાંચો: ગુજરાત ચૂંટણીમાં ‘બિનહરીફ’નો દબદબો: 67થી વધુ બેઠકો પર મતદાન વિના જ ભાજપનો વિજય, જનતા મતાધિકારથી વંચિત
