Pakistan Bomb Blast : પાકિસ્તાનમાં આર્થિક અને રાજકીય કટોકટી વચ્ચે સુરક્ષા વ્યવસ્થા પણ સંપૂર્ણપણે કથળી ગઈ છે. પાકિસ્તાનના સરહદી પ્રાંતમાંથી વધુ એક અત્યંત લોહિયાળ અને ભયાનક આતંકવાદી હુમલાના સમાચાર સામે આવ્યા છે. સત્તાવાર અહેવાલ અનુસાર, પાકિસ્તાનના ખૈબર પખ્તુનખ્વા (Khyber Pakhtunkhwa) પ્રાંતના અશાંત ગણાતા ઉત્તરી વજીરિસ્તાન અને આસપાસના વિસ્તારોમાં આતંકવાદીઓ દ્વારા બે અલગ-અલગ મોટા બોમ્બ બ્લાસ્ટ કરવામાં આવ્યા છે. આ ઘાતક આત્મઘાતી અને આઈઈડી (IED) વિસ્ફોટોમાં પાકિસ્તાની સેનાના ૭ જવાનોના ઘટનાસ્થળે જ કમકમાટીભર્યા મોત નીપજ્યા છે, જ્યારે અન્ય ૩ સુરક્ષાકર્મીઓ ગંભીર રીતે ઈજાગ્રસ્ત થયા હોવાના અહેવાલ છે.
Pakistan Bomb Blast : સૈન્યના વાહનને IED બ્લાસ્ટથી ઉડાવી દીધું
અહેવાલ અનુસાર, પ્રથમ અને સૌથી મોટો વિસ્ફોટ ઉત્તરી વજીરિસ્તાન જિલ્લાના રઝમાક વિસ્તારમાં થયો હતો. જ્યાં પાકિસ્તાની સુરક્ષાદળોની ટુકડી નિયમિત પેટ્રોલીંગ (સર્ચ ઓપરેશન) પર જઈ રહી હતી, ત્યારે જ આતંકવાદીઓએ રસ્તાની બાજુમાં પ્લાન્ટ કરેલા રિમોટ કંટ્રોલ્ડ આઈઈડી (Improvised Explosive Device) વડે સૈન્યના વાહનને નિશાન બનાવ્યું હતું. આ બ્લાસ્ટ એટલો ભયાનક હતો કે સૈન્યનું વાહન સંપૂર્ણપણે બળીને ખાખ થઈ ગયું હતું. આ ઘટનાના થોડા જ સમય બાદ નજીકના અન્ય એક ચેકપોસ્ટ પાસે બીજો વિસ્ફોટ કરવામાં આવ્યો હતો. સ્થાનિક સુરક્ષા એજન્સીઓના જણાવ્યા મુજબ, આ ડબલ એટેકમાં અત્યાર સુધીમાં ૭ સૈનિકોના મોતના સત્તાવાર અહેવાલ મળ્યા છે.
તહરીક-એ-તાલિબાન પાકિસ્તાન (TTP) પર આશંકા
અહેવાલ અનુસાર, આ હુમલા બાદ ઈજાગ્રસ્ત થયેલા જવાનોને તાત્કાલિક લશ્કરી હેલિકોપ્ટર મારફતે નજીકની સૈન્ય હોસ્પિટલમાં ખસેડવામાં આવ્યા છે, જ્યાં બે સૈનિકોની હાલત અત્યંત નાજુક હોવાનું કહેવાય છે. જો કે, હજુ સુધી પાકિસ્તાનના કોઈ પણ આતંકવાદી સંગઠને આ હુમલાની સત્તાવાર જવાબદારી સ્વીકારી નથી, પરંતુ આ વિસ્તારમાં સક્રિય પ્રતિબંધિત આતંકી સંગઠન તહરીક-એ-તાલિબાન પાકિસ્તાન (TTP) દ્વારા આ લોહિયાળ ઓપરેશન પાર પાડવામાં આવ્યું હોવાની પ્રબળ આશંકા સુરક્ષા એજન્સીઓ સેવી રહી છે. પાકિસ્તાની સેના દ્વારા સમગ્ર વજીરિસ્તાન અને અફઘાનિસ્તાન સરહદને સીલ કરીને આતંકીઓને પકડવા માટે મોટા પાયે ‘ક્લીયરન્સ ઓપરેશન’ શરૂ કરી દેવામાં આવ્યું છે.
આ પણ વાંચો: પાકિસ્તાનમાં ક્રૂરતાની હદ પાર: ગુરુદ્વારામાં ઘૂસીને વયસ્ક શીખ દંપતીની ગોળી મારી હત્યા
