USA Iran Conflict Update : અમેરિકા અને ઈરાન વચ્ચેનો ભૌગોલિક-રાજકીય તણાવ બુધવારે વધુ ઘેરો બન્યો છે. અમેરિકી રાષ્ટ્રપતિ ડોનાલ્ડ ટ્રમ્પે ઈરાન સાથેની સીઝફાયર ડીલને સત્તાવાર રીતે “ખતમ” જાહેર કરી દીધી છે. નાટો (NATO) સમિટ દરમિયાન ટ્રમ્પે આકરા શબ્દોમાં ઈરાન પર પ્રહાર કરતા કહ્યું કે, “મારા માટે આ કરારનો અંત આવી ગયો છે. હવે તેમની સાથે કોઈ સમજૂતી કરવાની મારી ઈચ્છા નથી. તેમની સાથે વાત કરવી એ સમયનો બગાડ છે.”
USA Iran Conflict Update : ટ્રમ્પના તેવર અને ઈરાનનો વળતો પ્રહાર
ટ્રમ્પે ઈરાની નેતૃત્વને “ઘટિયા” ગણાવીને ચેતવણી આપી હતી કે, જો તેઓ પરમાણુ હથિયાર મેળવવાનો પ્રયાસ કરશે તો તે સહન કરવામાં આવશે નહીં. બીજી તરફ, ઈરાને પણ આક્રમક વલણ અપનાવ્યું છે. ઈરાની રિવોલ્યુશનરી ગાર્ડ્સે હોર્મુઝ સ્ટ્રેટમાં અમેરિકાના 85 સૈન્ય ઠેકાણાઓને નિશાન બનાવવાની ધમકી આપી છે. ઈરાની સંસદની રાષ્ટ્રીય સુરક્ષા સમિતિના પ્રમુખ ઇબ્રાહિમ અઝીઝીએ સ્પષ્ટ કર્યું છે કે, “અમેરિકાએ હોર્મુઝ સ્ટ્રેટમાં ઈરાનની નવી વ્યવસ્થાને માન્યતા આપવી પડશે, આ સિવાય અન્ય કોઈ વિકલ્પ નથી.”
યુદ્ધના ભણકારા: શું છે આજના મુખ્ય ઘટનાક્રમ?
-
અમેરિકી હુમલા: અમેરિકાએ ઈરાનના ખુઝેસ્તાન પ્રાંતના માહશહર, ઈમામ ખુમેની પોર્ટ અને હમિદિયા શહેરોમાં હવાઈ હુમલા કર્યા છે. ઈરાની અધિકારીઓના જણાવ્યા અનુસાર, આ હુમલામાં એક વ્યક્તિનું મોત થયું છે અને બે લોકો ઘાયલ થયા છે.
-
ઈરાનની ચેતવણી: ઈરાનના ખાતમ અલ-અંબિયા સેન્ટ્રલ હેડક્વાર્ટર દ્વારા કહેવામાં આવ્યું છે કે, જો કોઈ દેશ અમેરિકી સેનાને ઈરાન વિરુદ્ધ મદદ કરશે, તો તે દેશના તે સ્ત્રોતને પણ ઈરાની સેના એક “વૈધ નિશાન” (Legitimate Target) તરીકે ગણશે.
-
આંતરરાષ્ટ્રીય ચિંતા: ઇન્ટરનેશનલ મેરીટાઇમ ઓર્ગેનાઇઝેશન (IMO) ના સેક્રેટરી-જનરલ આર્સેનિયો ડોમિંગ્વેઝે હોર્મુઝ સ્ટ્રેટમાં વેપારી જહાજો પર થયેલા હુમલાઓની આકરી ટીકા કરી છે અને બંને દેશોને સંયમ રાખવા અપીલ કરી છે.
વૈશ્વિક અસરો
આ સંઘર્ષને કારણે સમગ્ર મધ્ય પૂર્વમાં અસ્થિરતાનો માહોલ સર્જાયો છે. ક્રૂડ ઓઈલના પુરવઠામાં અવરોધ આવવાની આશંકાએ વૈશ્વિક બજારોમાં ગભરાટ ફેલાયો છે. શેરબજારોમાં પણ આજે આ તણાવની સીધી અસર જોવા મળી હતી, જ્યાં રોકાણકારોની અબજોની સંપત્તિનું ધોવાણ થયું છે.
આ પણ વાંચો: ડોનાલ્ડ ટ્રમ્પના નિવેદન અને તણાવને પગલે ભારતીય શેરબજારમાં ભૂકંપ, રોકાણકારોના 8 લાખ કરોડ સ્વાહા
