Amreli Lion Video: અંબાર્ડી સફારી પાર્કમાં બાઈકથી સિંહનો પીછો, 3 કર્મચારીઓ ફરજ પરથી દૂર

Amreli Lion Video

Amreli Lion Video સોશિયલ મીડિયા પર વાયરલ થતાં અમરેલી જિલ્લાના અંબાર્ડી સફારી પાર્કમાં વન વિભાગના કર્મચારીઓની કામગીરી ચર્ચામાં આવી છે. વીડિયોમાં કેટલાક કર્મચારીઓ બાઈક પર સવાર થઈને એક સિંહને હાંકી તેની પાછળ જતા જોવા મળે છે. આ મામલે વન વિભાગે તપાસ શરૂ કરી હતી અને ત્રણ આઉટસોર્સ કર્મચારીઓને ફરજ પરથી દૂર કર્યા હોવાનું મુખ્ય વન સંરક્ષક જયપાલ સિંહે જણાવ્યું છે.

મુખ્ય વન સંરક્ષકના જણાવ્યા અનુસાર, સાંજના સમયે કર્મચારીઓ સિંહને તેના ક્રાલ એટલે કે વાડા તરફ લઈ જઈ રહ્યા હતા. સામાન્ય રીતે આ કામગીરી માટે જીપનો ઉપયોગ કરવામાં આવે છે, પરંતુ આ ઘટનામાં કર્મચારીઓએ બાઈકનો ઉપયોગ કર્યો હતો.

Amreli Lion Video: તપાસ બાદ ત્રણ કર્મચારીઓ સામે કાર્યવાહી

જયપાલ સિંહે જણાવ્યું કે વીડિયો સામે આવ્યા બાદ વન વિભાગે તપાસ હાથ ધરી હતી. ત્યારબાદ સંબંધિત કર્મચારીઓને નોટિસ આપવામાં આવી અને ત્રણ આઉટસોર્સ કર્મચારીઓને તેમની ફરજ પરથી દૂર કરવામાં આવ્યા હતા.

સહાયક વન સંરક્ષક (ACF) મિતેશ વાનિયાના જણાવ્યા અનુસાર, આ વીડિયો દિવાળીના તહેવાર દરમિયાન રેકોર્ડ કરવામાં આવ્યો હતો. જોકે, તેમણે સિંહને પરેશાન કરવામાં આવ્યો હોવાના દાવાનો ઇનકાર કર્યો હતો.

સિંહને વાડા તરફ લઈ જવા બાઈકનો ઉપયોગ કર્યો હતો

વાનિયાએ જણાવ્યું કે અંબાર્ડી સફારી પાર્ક 300 હેક્ટરથી વધુ વિસ્તારમાં ફેલાયેલો છે. અહીં દરરોજ સાંજે 5 વાગ્યે સિંહોને 100 બાય 100 મીટરના વાડામાં ખોરાક આપવામાં આવે છે. વીડિયોમાં દેખાતો સિંહ વાડામાંથી બહાર ભટકી ગયો હોવાનું કર્મચારીઓના ધ્યાનમાં આવ્યું હતું. ત્યારબાદ તેને પાછો વાડા તરફ લઈ જવામાં આવી રહ્યો હતો.

તેમણે વધુમાં જણાવ્યું કે રજાઓ દરમિયાન સફારી પાર્કમાં પ્રવાસીઓની ભારે ભીડ હતી. પાર્કની કામગીરી ચાલુ રાખવા કર્મચારીઓએ સતત 12 કલાક સુધી ફરજ બજાવી હતી. જોકે, સિંહને વાડા તરફ લઈ જવા માટે બાઈકનો ઉપયોગ કરવો યોગ્ય હતો કે નહીં તે અંગે વન વિભાગે તપાસ કરી હતી.

આ ઘટનાએ વન્યપ્રાણીઓની સંભાળ અને સફારી પાર્કમાં કર્મચારીઓ દ્વારા અપનાવવામાં આવતી કામગીરીની પદ્ધતિ અંગે ચર્ચા જગાવી છે. વન વિભાગે ત્રણ કર્મચારીઓને ફરજ પરથી દૂર કરવાની કાર્યવાહી કરી છે.

દૂધ બાદ હવે અમૂલ દહીં અને લસ્સી પણ મોંઘાં થયાં, જાણો નવા ભાવ