Ahmedabad Cyber Fraud નો ચોંકાવનારો કિસ્સો સામે આવ્યો છે. અમદાવાદના ચાંદખેડામાં રહેતા 36 વર્ષીય વેપારીના કરન્ટ એકાઉન્ટનું નેટ બેન્કિંગ હેક કરીને અજાણ્યા શખ્સે કુલ રૂ. 68,31,539 અન્ય બેન્ક ખાતાઓમાં ટ્રાન્સફર કરી લીધા હોવાની ફરિયાદ નોંધાઈ છે. આશ્ચર્યની વાત એ છે કે આ વ્યવહારો દરમિયાન વેપારીના રજિસ્ટર્ડ મોબાઈલ નંબર પર કોઈ OTP કે નવો બેનિફિશિયરી ઉમેરાયો હોવાનો મેસેજ આવ્યો નહોતો.
ફરિયાદ મુજબ, વેપારી 4 નવેમ્બરે ધોલેરાથી અમદાવાદ પરત ફરી રહ્યા હતા. બપોરે આશરે 1:30 વાગ્યે તેમના મોબાઈલ પર બેન્ક ખાતામાંથી રૂ. 10 લાખ ડેબિટ થયાનો સંદેશ આવ્યો હતો. આ મેસેજ જોઈને તેઓ ચોંકી ગયા હતા અને તાત્કાલિક બેન્કનો સંપર્ક કરીને ખાતું હોલ્ડ કરવા તથા બંધ કરવાની વિનંતી કરી હતી.
જોકે, બેન્કને જાણ કર્યા બાદ પણ ખાતામાંથી અન્ય રકમ ટ્રાન્સફર થવાના સંદેશ મળતા રહ્યા હતા. તપાસ કરતાં તેમના ખાતામાંથી જુદી-જુદી બેન્કોના ખાતાઓમાં કુલ રૂ. 68.31 લાખ ટ્રાન્સફર થયાની જાણ થઈ હતી.
OTP વિના કેવી રીતે થઈ છેતરપિંડી?
ફરિયાદમાં આશંકા વ્યક્ત કરવામાં આવી છે કે હેકરે અગાઉથી વેપારીની નેટ બેન્કિંગ એપ્લિકેશન સાથે જોડાયેલો ડેટા ચોરીને સિસ્ટમમાં પ્રવેશ મેળવ્યો હતો. ત્યારબાદ વેપારીની જાણ બહાર ઓનલાઈન વ્યવહારો કરવામાં આવ્યા હતા.
Ahmedabad Cyber Fraud: વેપારીએ સાયબર હેલ્પલાઈન પર કરી ફરિયાદ
છેતરપિંડીની જાણ થતાં વેપારીએ પોતાના ભાગીદારને બેન્કમાં મોકલ્યા હતા અને સાયબર હેલ્પલાઈન નંબર 1930 પર સંપર્ક કરીને ફરિયાદ નોંધાવી હતી. આ ઉપરાંત અજાણ્યા હેકર વિરુદ્ધ પોલીસમાં પણ ફરિયાદ કરવામાં આવી છે.
આ ઘટનામાં ખાસ કરીને OTP કે નવા બેનિફિશિયરી ઉમેરાવાનો સંદેશ ન મળ્યો હોવાની બાબત સામે આવી છે. જોકે, હેકરે કઈ ટેકનિકથી બેન્કિંગ સિસ્ટમમાં પ્રવેશ મેળવ્યો અને નાણાં કયા ખાતાઓમાં મોકલ્યાં તે અંગેની સંપૂર્ણ વિગતો તપાસ બાદ જ સ્પષ્ટ થશે.
