Ashok Dham Temple Stampede પવિત્ર શ્રાવણ માસના ત્રીજા સોમવારે બિહારના લખીસરાય જિલ્લામાં આવેલા પ્રસિદ્ધ અશોક ધામ મંદિર (ઇન્દ્રદમેશ્વર મહાદેવ મંદિર) માં એક અત્યંત હચમચાવી નાખતી દુર્ઘટના ઘટી છે. ભારે ભીડ અને અફરાતફરી વચ્ચે સર્જાયેલી નાસભાગ (Stampede) માં ૭ શ્રદ્ધાળુઓના કરૂણ મોત નીપજ્યા છે, જ્યારે આઠથી વધુ લોકો ઘાયલ થયા છે. આ દુર્ઘટનાથી સમગ્ર વિસ્તારમાં શોકનો માહોલ છવાઈ ગયો છે.
કેવી રીતે સર્જાઈ દુર્ઘટના ? (Lakhisarai Ashok Dham Temple Stampede)
મળતી માહિતી મુજબ, શ્રાવણ માસના ત્રીજા સોમવારે શિવલિંગ પર જળાભિષેક કરવા માટે વહેલી સવારથી જ શ્રદ્ધાળુઓનું ઘોડાપૂર ઉમટ્યું હતું. મંદિર પરિસરમાં અંદાજ કરતાં પણ અનેક ગણી વધુ ભીડ એકત્રિત થઈ હતી.
-
ટ્રેનોનું આગમન અને ભીડનો વધારો: લખીસરાય જિલ્લા મેજિસ્ટ્રેટના જણાવ્યા અનુસાર, સવારના સમયે અશોક ધામ હોલ્ટ પર બે ટ્રેનો એકસાથે પહોંચી હતી, જેના કારણે એકાએક શ્રદ્ધાળુઓની સંખ્યામાં અણધાર્યો વધારો થયો હતો.
-
વીજળીના તાર અને અફવા: ભીડ વધુ હોવાને કારણે નજીકમાં એક ઇલેક્ટ્રિક પોલ અને કેબલ વાયર નીચે પડ્યો હતો, જેના કારણે વાયર કરંટ ફેલાવવાની અફવા ફેલાઈ હતી. આ અફવાને કારણે લોકોમાં ભારે ગભરાટ ફેલાયો હતો અને અફરાતફરી મચી ગઈ હતી.
-
બેરિકેટિંગ તૂટવાથી નાસભાગ: ભીડના ભારે દબાણ અને અફવાને કારણે લોકો જીવ બચાવવા દોડવા લાગ્યા હતા, જેમાં બેરિકેટિંગનો એક ભાગ તૂટી પડતા શ્રદ્ધાળુઓ એકબીજા પર પટકાયા હતા અને કચડાઈ જવાથી આ મોટી દુર્ઘટના ઘટી હતી.
તંત્રની કાર્યવાહી અને સહાયની ઘોષણા
ઘટનાની જાણ થતા જ સ્થાનિક પોલીસ પ્રશાસન અને રેસ્ક્યુ ટીમ તાત્કાલિક ઘટનાસ્થળે દોડી આવ્યા હતા. તમામ ઘાયલોને તાત્કાલિક સારવાર માટે લખીસરાય સદર હોસ્પિટલ તથા અન્ય નજીકની હોસ્પિટલોમાં ખસેડવામાં આવ્યા છે. બિહારના મુખ્યમંત્રી સમ્રાટ ચૌધરીએ આ દુર્ઘટના પર ઊંડો શોક વ્યક્ત કરતા મૃતકોના પરિવારજનો માટે ₹૪ લાખની સહાય (Ex-gratia) ની જાહેરાત કરી છે. આ સાથે જ તંત્ર દ્વારા ઘાયલોની યોગ્ય સારવાર માટેના નિર્દેશો આપવામાં આવ્યા છે.
આ પણ વાંચો પવિત્ર શ્રાવણ માસનો પ્રારંભ: ગુજરાતના શિવાલયો ‘હર હર મહાદેવ’ના નારાથી ગૂંજ્યા
