Bilkis Bano Case: ગુજરાતના 2002ના બિલકિસ બાનો ગેંગરેપ અને પરિવારના સભ્યોની હત્યાના કેસમાં સુપ્રીમ કોર્ટે મહત્વનો આદેશ આપ્યો છે. અદાલતે આ કેસમાં આજીવન કેદની સજા ભોગવી રહેલા બે દોષિતોની સજા સ્થગિત કરીને તેમને જામીન આપ્યા છે. બંને દોષિત 17 વર્ષથી વધુ સમય જેલમાં વિતાવી ચૂક્યા છે.
સુપ્રીમ કોર્ટની જસ્ટિસ એમ.એમ. સુંદરેશ અને જસ્ટિસ પ્રસન્ના બી. વરાલેની બેન્ચે 28 ઓક્ટોબર, 2026ના રોજ આ આદેશ આપ્યો હતો. આદેશ તાજેતરમાં જાહેર થયો છે. બંનેની અપીલ પર અંતિમ નિર્ણય હજુ બાકી છે.
Bilkis Bano Case: બિપિનચંદ્ર જોશી અને પ્રદીપ મોઢિયાને રાહત
સુપ્રીમ કોર્ટમાંથી જામીન મેળવનારા બે દોષિતોના નામ બિપિનચંદ્ર કનૈયાલાલ જોશી અને પ્રદીપ રામલાલ મોઢિયા છે. બંનેએ બોમ્બે હાઈકોર્ટના 2017ના ચુકાદા સામે સુપ્રીમ કોર્ટમાં અપીલ કરી હતી.
અદાલતે નોંધ્યું કે બંને 17 વર્ષથી વધુ સમયથી જેલમાં છે. આ ઉપરાંત, એક દોષિત ગંભીર શારીરિક અક્ષમતા ધરાવે છે. અપીલમાં કાયદાકીય અને હકીકતલક્ષી મુદ્દાઓની તપાસ કરવાની બાકી હોવાથી અદાલતે સજા સ્થગિત કરવાનો નિર્ણય લીધો.
Bilkis Bano Case: ગુજરાત સરકારે જામીનનો વિરોધ કર્યો હતો
બંને દોષિતો તરફથી વરિષ્ઠ વકીલ સિદ્ધાર્થ લુથરાએ દલીલો રજૂ કરી હતી. તેમણે લાંબા સમયથી જેલમાં હોવાનો મુદ્દો ઉઠાવ્યો હતો. સાથે જ એક દોષિતનું નામ શરૂઆતની FIRમાં ન હોવા છતાં લગભગ ત્રણ વર્ષ બાદ કેસમાં સંડોવાયો હોવાની દલીલ કરી હતી.
બીજી તરફ, સરકાર તરફથી એડિશનલ સોલિસિટર જનરલ રાજા ઠાકરેએ જામીનનો વિરોધ કર્યો હતો. તેમણે ગુનાની ગંભીરતા અને નીચલી અદાલતો દ્વારા પુરાવાઓની તપાસનો મુદ્દો રજૂ કર્યો હતો.
જોકે, સુપ્રીમ કોર્ટે બંનેની સજા સ્થગિત કરીને ટ્રાયલ કોર્ટ દ્વારા નક્કી કરવામાં આવતી શરતોને આધીન જામીન આપવાનો આદેશ કર્યો છે.
2002ના ગુજરાત રમખાણો દરમિયાન બની હતી ઘટના
બિલકિસ બાનો કેસ ફેબ્રુઆરી 2002ના ગુજરાત રમખાણો સાથે જોડાયેલો છે. ગોધરા ટ્રેન અગ્નિકાંડ બાદ ફાટી નીકળેલી હિંસા દરમિયાન બિલકિસ બાનો પર સામૂહિક દુષ્કર્મ આચરવામાં આવ્યું હતું. તે સમયે તેઓ પાંચ મહિનાની ગર્ભવતી હતાં.
આ ઘટનામાં તેમના પરિવારના સાત સભ્યોની હત્યા કરવામાં આવી હતી. તેમાં તેમની ત્રણ વર્ષની પુત્રીનો પણ સમાવેશ થતો હતો. આ કેસમાં કુલ 11 દોષિતોને આજીવન કેદની સજા ફટકારવામાં આવી હતી.
2024માં 11 દોષિતોની મુક્તિ રદ થઈ હતી
ઓગસ્ટ 2022માં ગુજરાત સરકારે આ કેસના 11 દોષિતોને સજા માફી આપીને મુક્ત કર્યા હતા. જોકે, જાન્યુઆરી 2024માં સુપ્રીમ કોર્ટે આ મુક્તિનો નિર્ણય રદ કર્યો હતો. ત્યારબાદ દોષિતોને ફરી જેલમાં મોકલવામાં આવ્યા હતા.
હવે તેમાંથી બે દોષિતોને તેમની અપીલની સુનાવણી બાકી રહેતા જામીન મળ્યા છે. આ આદેશથી તેમની દોષસિદ્ધિ રદ થઈ નથી. સુપ્રીમ કોર્ટમાં તેમની અપીલ પર આગળ સુનાવણી થશે.

