ગુજરાતમાં તીવ્ર ગરમીની ઋતુ શરૂ થઈ છે, અને રાજ્યમાં ગરમીનો પારો 44 ડિગ્રીને પાર પહોંચી ગયો છે. હવે આગલા દિવસોમાં આકરી ગરમીનો સામનો કરવાનો રહેશે. 4 એપ્રિલ, શુક્રવારે, રાજ્યમાં સિઝનનું સૌથી વધુ 44.5 ડિગ્રી તાપમાન ભુજમાં નોંધાયું હતું. હીટવેવની અસરથી, અમદાવાદનું તાપમાન 41 ડિગ્રીને પાર થયું છે, જે ગત વર્ષના એપ્રિલની સરખામણીએ એક અઠવાડિયા વહેલું છે.
સૌરાષ્ટ્ર અને કચ્છમાં હીટવેવની આગાહી
હવામાન વિભાગે આજથી 9 એપ્રિલ સુધી સૌરાષ્ટ્ર અને કચ્છમાં હીટવેવની આગાહી કરી છે. 6 એપ્રિલથી ઉત્તર ગુજરાતના જિલ્લાઓમાં પણ હીટવેવની અસર જોવા મળશે. કચ્છ અને રાજકોટ જિલ્લામાં ઓરેન્જ અને યલો એલર્ટ જાહેર કરવામાં આવ્યા છે.
રાજ્યમાં તાપમાનમાં 2 થી 3 ડિગ્રીનો વધારો
હવામાન વિભાગની આગાહી મુજબ, દક્ષિણ પશ્ચિમ રાજસ્થાન, પશ્ચિમ મધ્ય પ્રદેશ અને મરાઠવાડામાં સાયક્લોનિક સર્ક્યુલેશન સર્જાયું છે. જેના કારણે પવન ગરમ રહેશે અને કેટલાક વિસ્તારોમાં ભેજથી ધુમ્મસ પણ દેખાય શકે છે. રાજ્યમાં 8 એપ્રિલ સુધી મહત્તમ તાપમાનમાં 2 થી 3 ડિગ્રી સેલ્સિયસનો વધારો થવાની શક્યતા છે.
અમદાવાદમાં 41 ડિગ્રીના પરા સાથે ગરમીનો પ્રકોપ
4 એપ્રિલે, ભુજમાં સિઝનનું સૌથી વધુ 44.5 ડિગ્રી તાપમાન નોંધાયું હતું. જ્યારે અમદાવાદ, ભાવનગર, ડીસા, નલિયા, રાજકોટ અને અમરેલી જેવા આઠ શહેરોમાં તાપમાન 40 ડિગ્રીને પાર થયું. અમદાવાદમાં, આ વર્ષે એક અઠવાડિયા વહેલા, 41.3 ડિગ્રી ગરમીનો પારો પહોંચ્યો છે. ગત વર્ષે 11 એપ્રિલે 41.5 ડિગ્રી ગરમી નોંધાઈ હતી.
આગામી દિવસોમાં ગરમીમાં વધારો
આગામી ચાર દિવસોમાં ગરમીનો પારો ધીમે ધીમે વધશે, અને લોકો માટે ગરમીના પ્રકોપ સાથે સાથે હીટવેવનું સંકટ પણ વધી શકે છે.
