Lt Gen Dhiraj Seth : કેન્દ્ર સરકાર દ્વારા ભારતીય સેનાના આગામી નવા વડા તરીકે લેફ્ટનન્ટ જનરલ ધીરજ સેઠ (Lt Gen Dhiraj Seth) ની સત્તાવાર નિયુક્તિ કરવામાં આવી છે. વર્તમાન આર્મી ચીફ જનરલ ઉપેન્દ્ર દ્વિવેદી આગામી ૩૦મી જૂન ૨૦૨૬ ના રોજ નિવૃત્ત થઈ રહ્યા છે, ત્યારબાદ તે જ દિવસે લેફ્ટનન્ટ જનરલ ધીરજ સેઠ દેશના નવા સૈન્ય પ્રમુખ તરીકેનો સર્વોચ્ચ પદભાર સંભાળશે. હાલમાં તેઓ ભારતીય સેનાના વાઇસ ચીફ (Vice Chief of Army Staff) તરીકે સેવા આપી રહ્યા છે અને સંરક્ષણ વર્તુળોમાં તેમની ગણના એક અત્યંત કુશળ વ્યુહરચનાકાર તરીકે થાય છે.
Lt Gen Dhiraj Seth : જાણો તેમના વિશે
અહેવાલ મુજબ, લેફ્ટનન્ટ જનરલ ધીરજ સેઠનો સૈન્ય ઈતિહાસ અને પારિવારિક પૃષ્ઠભૂમિ ખુબ જ ગૌરવશાળી રહ્યા છે. તેઓ પ્રતિષ્ઠિત રાષ્ટ્રીય સંરક્ષણ એકેડેમી (NDA), ખડકવાસલા અને ઇન્ડિયન મિલિટરી એકેડેમી (IMA), દેહરાદૂનના પ્રતિભાશાળી ભૂતપૂર્વ વિદ્યાર્થી છે. ડિસેમ્બર ૧૯૮૬માં તેઓ ભારતીય સેનાની પ્રખ્યાત ‘બીજી લેન્સર્સ’ (2nd Lancers) આર્મ્ડ કોર્પ્સ રેજિમેન્ટમાં કમિશન થયા હતા. ખાસ વાત એ છે કે, તેમના પિતા પણ ભારતીય સેનામાં લેફ્ટનન્ટ જનરલના સર્વોચ્ચ પદ પરથી નિવૃત્ત થયા હતા, જેના કારણે દેશસેવા અને લશ્કરી શિસ્ત તેમને પરિવારમાંથી જ વારસામાં મળ્યા છે.
અનેક લશ્કરી સન્માનો એનાયત કરાયા
પોતાની આશરે ૪૦ વર્ષની ભવ્ય કારકિર્દી દરમિયાન તેમણે દેશના વિભિન્ન ઓપરેશનલ અને સંવેદનશીલ ક્ષેત્રોમાં સેનાનું સફળ નેતૃત્વ કર્યું છે. તેમણે જમ્મુ-કાશ્મીરમાં આતંકવાદ વિરોધી ફોર્સના કમાન્ડર તરીકે સરહદ પારના મનસૂબાઓને નાબૂદ કર્યા છે, તેમજ અંગોલામાં સંયુક્ત રાષ્ટ્ર (UN) ના પ્રતિષ્ઠિત શાંતિ રક્ષક મિશનમાં પણ ભારતનું પ્રતિનિધિત્વ કર્યું છે. તેઓ સેનાના પ્રતિષ્ઠિત દક્ષિણ કમાન્ડ (Southern Command) અને દક્ષિણ-પશ્ચિમ કમાન્ડના વડા પણ રહી ચૂક્યા છે. તેમની આ અસાધારણ સેવાઓ બદલ તેમને અગાઉ ‘અતિ વિશિષ્ટ સેવા મેડલ’ (AVSM) સહિતના અનેક લશ્કરી સન્માનો એનાયત કરાયા છે. નવા આર્મી ચીફ તરીકે તેમની સામે ભારતીય સેનાનું આધુનિકીકરણ અને સરહદી પડકારોનો સામનો કરવાની મુખ્ય જવાબદારી રહેશે.
આ પણ વાંચો: અસમના જોરહાટમાં વાયુસેનાનું AN-32 વિમાન લેન્ડિંગ વખતે ક્રેશ, 5 જવાનો શહીદ
